«Біз бәріміз бір атаның – қазақ халқының ұлымыз. Бәріміздің де туған жеріміз біреу: ол қасиетті қазақ даласы. Бұл дүниеде біздің бір ғана Отанымыз бар: ол тәуелсіз Қазақстан».
Нұрсұлтан Назарбаев
Тәуелсіздік – кез келген адамның, ұлттың, халықтың, елдің еркіндігі.
«Тәуелсіз Қазақстан!», «Қазақстан Республикасы»! Неткен керемет, киелі ұғымдар! Бұл ұғымдардан, Отанымыздың тәуелсіз, еркін мемлекет екенін бірден аңғаруға болады. Бүгінде біз – қанатын кеңге жайған егеменді елміз.
Тәуелсіздік үшін ақ білектің күшімен, ақ найзаның ұшымен елін қорғаған бабалар рухынан қуат алған ызғарлы Желтоқсан оқиғасы қазақ халқының қасіреті де, қасиеті де жетерлік тарихына айналды. Иә, Желтоқсан оқиғасы қаншама ызғарлы естілсе де, жанымызға нұр септі. Желтоқсан жаңғырығы бізге Тәуелсіздіктің таңын әкелді.
Қазақ халқының ғасырлар бойы аңсаған арманы «Қазақстан Республикасының мемлекеттік тәуелсіздігі туралы» конституциялық заң қабылданған сол бір тарихи күнде, 1991 жылдың 16-желтоқсан күні жүзеге асты. Дүниеге жаңа мемлекет – Тәуелсіз Қазақстан келді. Біз өзіміздің рәміздерімізбен мақтанамыз, Қазақстан Туымен тұғырлы, Елтаңбасымен еңселі, Әнұранымен айбатты.
Тәуәлсіздік күніне орай Нұр-Сұлтан қаласы әкімдігінің «Мамандандырылған балалар үйі» МКМ-нде «Тарихтар тоғысқанда» атты мерекелік іс-шарасы өтті. 1986 жылғы Желтоқсан оқиғасында алаңға шыққан жастардың ерік-жігері, қазақ халқының тәуелсіздік жолындағы ерлік күресі мен ғасырлар бойы басынан өткен қиыншылықтары жайлы айтылып, осы оқиғалардың қатысушылары — Қайрат Рысқұлбеков, Ербол Сыпатаев, Ләззат Асанованы және алаңға шығып еліміздің егеменді ел болуына үлес қосқан жандардың құрметіне 1 минуттық еске алу сәті өтті. «16 желтоқсан – Қазақстанның Тәуелсіздік алған күні», «Желтоқсан ызғары» атты бейнероликтер көрсетілді. Мемлекеттік Әнұран орындалып, патриоттық әндер айтылды. Мекеме директоры Сауле Кенжетайқызы ұжымды мерекемен арнайы құттықтап, жылы лебізін білдіріп, сөз сөйледі. Үздік жұмысымен көзге түсіп, белсенді қызмет атқарып жүрген мамандарымызға ҚР Денсаулық сақтау министрі Алексей Цойдың, Нұр-Сұлтан қаласының Қоғамдық денсаулық сақтау басқармасы басшысы Тимур Мұратұлының, Нұр-Сұлтан қаласының әкімі Алтай Көлгіновтың, Нұр-Сұлтан қаласы «Алматы» ауданы әкімі Бектенбай Тілектесұлының Құрмет грамоталары мен алғыс хаттары табыс етілді. Адал еңбегімен мекемемізде 10, 20, 25, 30 жыл бойы еңбек етіп, сәбилерімізге қамқорлығын көрсетіп, мейіріміне бөлеп жүрген тәрбиешілеріміз бен өзге де мамандарымызға кәсіподақ ұйымы естелік медалдары мен арнайы сыйлықтар табыс етті. Педиатр дәрігеріміз Масиха Сұлтанқызы «Денсаулық сақтау ісінің үздігі» төсбелгісімен марапатталды.
Мерекелік бағдарлама барысында Adebi.kz электронды ақпарат, білім сайты «Тәуелсіздік күні» мерейтойына орай ұйымдастырылған жалпы республикалық байқауға қатысып, «Қазақ қолөнері» номинациясында даралығын көрсетіп, жүлделі орынды иеленген дарынды бүлдүршініміз Қуатбеков Мирас дипломмен марапатталды. Жалпы республикалық байқауға балдырғанымызды дайындағаны үшін Бахытгуль Кусайнова арнайы алғыс хатпен марапатталды.
Тәуелсіздік – ащы термен келген тәтті жеңіс. Төгілген қанның, өлмеген жігердің отымен келген ұлы күн. Тәуелсіздігіміздің тұғыры биік, халқымыздың еңсесі жоғары, егемендігіміз баянды болсын.
