Ұлыстың ұлы күні әз-Наурыз мерекесіне арналған «Наурыз жыл басы» ертеңгілігін Елордалық балалар үйі бүлдіршіндері сүйікті ертегі кейіпкерлері Алдар Көсе және Баймен қызықты әрі ерекше атап өтті.

Мерекелік ертеңгілікке балаларымызға қонаққа Қызғалдақ пен Жел келді. Қызғалдақ бүлдіршіндерімізбен би билеп көңіл көтергелі жатқанда, оны Жел келіп ұшырып әкетті. Бүлдіршіндеріміз өздерінің бар күштерін ортаға салып, қазақтың ұлттық ойыны «Арқан тарту» ойынын ойнап, Желмен күш сынасты. Балаларымыздан жеңілген Жел ызғарлы ашуын басып, Қызғалдақты мерекелік ертеңгілікке қайта әкелді.

Қызғалдық өзін құтқарғаны үшін балаларымызға ризашылығы ретінде Қыдыр атаны мерекелік ертеңгілікке қонаққа шақырды. Балаларымыздың ерлігіне тәнті болған Қыдыр ата бүлдіршіндерімізге ақ батасын беріп, ізгі құттықтау тілегін айтты.

Мерекелік ертеңгілікте «Күнім» оңалту тобының балапандары өнерлерін ортаға салып, сылдырмақтардың сылдыр үнімен мерекенің сәнін келтірді. Балдырғандарымыз Байға шашылып түскен түрлі түсті асықтарын жинауға көмектесті. Ал Алдар Көсе өзінің сиқырлы қасығымен Наурызгүлге бауырсақтарды пісіруге көмектесті. Алдар Көсенің сиқырлы алтын қасығының көмегімен дәмді бауырсақтар дайын болысымен, Наурызгүл шашу шашып, бүлдіршіндерімізге таратып берді.

Ғажайып шытырман оқиғаларға толы, «Наурыз жыл басы» ертеңгілігі қызықты өтіп, бүлдіршіндерімізге мерекелік көтеріңкі көңіл күй мен қуаныш сыйлады.

Баршаңызды алдағы келе жатқан Ұлыстың Ұлы күні – Наурыз мерекесімен шын жүректен құттықтаймыз! Көктемнің шуақты күндері Сіздерге мықты денсаулық, мол табыс, шаттық пен қуаныш, береке мен молшылық алып келсін!

Еліміз тыныш, туған жеріміз аман болып, әрбір жаңа күн әр отбасына шат көңіл, бақыт және береке сыйласын!

Ұлыс оң болсын, ақ мол болсын!