Шуақты жаздың алғашқы күні 1 маусым – халықаралық деңгейде аталып өтетін «Балалар» мерекесі. Бұл күні балалардың өмірін, құқығын, денсаулығын қорғау, оларға қамқорлық жасау дәріптеледі. Осындай мейірімге, жылулық пен қуанышқа толы мереке – балдырғандардың қуанышты жанары мен сыңғырлаған сәби күлкісі арқылы ерекшеленеді.
Нұр-Сұлтан қаласы әкімдігінің «Мамандандырылған балалар үйі» МКМ-нде, 1 маусым – Халықаралық балаларды қорғау күніне арналған «Ғарыш әлеміне саяхат» атты салтанатты іс-шара өтті.
«Мейірім ордасы» елордалық балалар үйіне бүлдіршіндерді мерекемен құттықтап, түрлі сыйлықтарымен қуаныш сыйлау мақсатында Нұр-Сұлтан қаласы Денсаулық сақтау басқармасы басшысы Мұратов Тимур Мұратұлы, Нұр-Сұлтан қаласы Білім басқармасы қамқоршылық және қорғаншылық органы өкілдері, Нұр-Сұлтан қаласы «Алматы» ауданы полиция басқармасы өкілдері, Астана медицина университеті өкілдері, «Мереке» қайырымдылық қоры өкілдері, сот төрешілер корпусы, меценаттар мен демеушілер, «Нұр-Сұлтан қаласы әкімінің аппараты» ММ-нің Әйелдер істері және отбасылық –демографиялық саясат жөніндегі коммиссиясының бас инспекторы-хатшысы Саркенова Қарлығаш Сабитқызы мен әйелдер істері жөніндегі коммиссия мүшелері келіп, салтанатты мерекелік іс-шараның қадірлі қонағы болды.
Мерекелік іс-шарада бүлдіршіндеріміз бен құрметті қонақтарымыз – Ғарышкер, Қарақшы, Кемпірқосақ, Күн және Бұлттармен бірге «Ғарыш әлеміне» саяхат жасады. Ғажайыпқа толы ғарыш әлемінде балаларымыз өз өнерлерін ортаға салып, «Жұлдыздар», «Күн сәулелері», «Ақ бұлттар», «Күн жүйесіндегі ғаламшарлар», «Ғарышкерлер» биі мен «Зымыран» флешмобын билеп, «Жұлдыздарды жина», «Күн мен Жаңбыр» атты қызықты ойындарды ойнап қуанышқа кенелді.
Сондай-ақ, балаларды қорғау күні мерекесі аясында Данияр есімді сымбатты бүлдіршініміздің тұсау кесу рәсімі өткізілді. Даниярдың алғашқы қадамы оң, жолы ашық болсын деген ізгі тілегімен тұсауын ҚР ҰҚК полковнигі Оразбаев Айбек Аманбайұлы кесті.
Мерекелік іс-шара өте қызықты өтті. Қылықты балапандарға түрлі тәттілер мен әдемі ойыншықтар үйлестіріліп, мерекелік бағдарлама есте қаларлық естелік суреттерге түсуге ұласты.
